Фуқаролик ишлари бўйича Бўстон туманлараро судининг ижро ҳужжатига биноан қарздор А.Н.дан ундирувчи Д.Ю. фойдасига икки нафар вояга етмаган фарзандининг моддий таъминоти учун алимент ундириш белгиланган.
Маълум бўлишича, қарздор А.Н. 2020 йилда, яъни суд ҳужжати чиқарилишидан олдин Россия федерациясига ишлаш учун кетган ва у хорижда бўлган даврида алимент тўловларини ўз вақтида тўламагани сабаб қарздорлик 20 млн сўмдан ортиб кетган.
Ижро ҳаракатлари давомида қарздор жорий йилнинг март ойида юртимиз ҳудудига қайтганлиги аниқланган.
Шунга кўра, қарздор билан профилактик суҳбат ўтказилиб, алимент қарзларини тўлаши тушунтирилган. Алимент тўловчи ота қарздорлик ва фарзандларининг келгусидаги алимент тўловлари эвазига ўзининг Улуғнор туманида жойлашган беш хонали ҳовлисини беришини маълум қилган.
Шундай қилиб, хонадон ҳужжатлари ундирувчининг номига расмийлаштириб берилди ва ижро ҳужжатининг ижроси таъминланди.
