2025 йил 1 сентябргача Ўзбекистонда “Ҳаж ва Умра ягона портали” ишга туширилади. Ушбу тизим орқали ҳаж ва умра сафарларини ташкил қилиш жараёнлари тўлиқ рақамлаштирилади. Портал фуқаролар учун ягона электрон навбат ва рўйхат шакллантириш имконини беради.
Бу ҳақда Президентнинг “Фуқароларнинг виждон эркинлиги ҳуқуқи кафолатларини янада мустаҳкамлаш ҳамда диний-маърифий соҳадаги ислоҳотларни янги босқичга олиб чиқиш чора-тадбирлари тўғрисида”ги фармонида белгилаб ўтилган.
Портални Дин ишлари бўйича қўмита ҳамда Рақамли технологиялар вазирлиги биргаликда ишлаб чиқади.
Бунда қуйидаги жиҳатлар инобатга олинади:
— Ҳаж сафарлари учун ягона электрон навбат
— Умра сафарлари учун электрон рўйхат шакллантирилади
— Ҳужжатларни йиғиш ва расмийлаштириш рақамли шаклда амалга оширилади
— Тизимга тегишли вазирлик ва идоралар ўз ахборот базаларини интеграция қилади
Портал фаолияти учун зарур техник ва молиявий қўллаб-қувватлашни Дин ишлари бўйича қўмита таъминлайди.
Шунингдек, Умра тадбирларини ташкил этиш учун лицензияга эга юридик шахслар ва Ўзбекистон мусулмонлари идораси портал орқали хизматлардан фойдаланиш имкониятига эга бўлади.
Бу ташаббус орқали ҳаж ва умра зиёратларини амалга оширишдаги ортиқча бюрократик тўсиқлар бартараф этилади, жараёнлар шаффоф ва қулай шаклга келтирилади.
