Коррупцияга қарши курашиш агентлиги 2024 йил якунларига кўра давлат органлари ва ташкилотларида очиқлик бўйича амалга оширилган ишларнинг самарадорлиги ва натижадорлигини баҳолади.
Очиқлик индекси асосида баҳолаш натижаларига кўра, 50 та давлат органи “яшил” (2023-йилда 31 та), 35 таси “сариқ” (43 та) ва 13 таси “қизил” (29 та) самарадорлик кўрсаткичларини қайд этди.
Энг юқори самарадорлик кўрсаткичлари “Олмалиқ кон-металлургия комбинати” АЖ (91 балл), Солиқ қўмитаси (90 балл), “Ўзавтосаноат” АЖ (89 балл) ва “Навоий кон-металлургия комбинати” АЖ (89 балл) томонидан кўрсатилган.
Очиқлик бўйича энг паст кўрсаткичларни Андижон вилояти ҳокимлиги (28,5 балл) ва Кинематография агентлиги (30,43 балл) қайд этди. Шунингдек, учинчи тоифага Фармацевтика тармоғини ривожлантириш агентлиги, Миллий антидопинг агентлиги, Гидрометеорология хизмати агентлиги, "Асака" АТБ, "Йўлқурилиш" АЖ, Жиззах, Фарғона ва Сирдарё вилоятлари ҳокимликлари, Оила ва хотин-қизлар қўмитаси, Электр энергияси, нефт маҳсулотлари ва газдан фойдаланишни назорат қилиш инспексияси, "РЕС" АЖ киритилди.
