Украина Россия босқинидан сўнг ҳарбий хизматга чақириладиган эркаклар учун мамлакатдан чиқиш бўйича қатъий чекловлар жорий қилган эди. Шу кунгача 49 мингдан ортиқ эркак ноқонуний тарзда чет элга чиқишга уринган ва улар чегарада тўхтатилган. Бу ҳақда Украина Давлат чегара хизмати вакили Андрей Демченко маълум қилди.
Унинг сўзларига кўра, 45 минг эркак яширин йўллар орқали чегарани бузиб ўтмоқчи бўлган, уларнинг кўпи “яшил чегара” — ўрмонзор ва тоғли ҳудудлар орқали чиқишга уринган. Яна 4 минг нафарга яқин киши сохта ҳужжатлар ёки бошқа ноқонуний усуллар билан чиқмоқчи бўлган.
Шунингдек, эркакларга қочишда ёрдам берган 900 га яқин жиноят гуруҳи аниқланган. Улар ўз “хизматлари” учун 4500 евродан 11 минг еврогача пул олган.
Шунга қарамай, Европа Иттифоқи давлатларида 800 мингдан ортиқ украиналик эркаклар вақтинча ҳимоя мақомини олган. Бу эса қонуний чиқиш йўллари қанчалик долзарб масала эканини кўрсатмоқда.
