Австралияда сўнгги йиллардаги энг фалокатли сув тошқинлари кузатилмоқда. Хусусан, Янги Жанубий Уэльсда кучли сув тошқини оқибатида 4 киши ҳалок бўлди ва бир неча киши бедарак йўқолди. Бу ҳақда BBC хабар берди.
Телеканалга кўра, кучли ёмғир кеча, 22 май куни кечаси жанубга силжиб, Сидней ва Ньюкасл шаҳарларига етиб борган. Метеорология бюроси штатнинг жанубий қисмлари учун огоҳлантириш эълон қилган.
Янги Жанубий Уэльс Фавқулодда хизмати 24 соат ичида – маҳаллий вақт билан 05:00 гача бўлган вақт ичида 535 дан ортиқ, тошқин бошланганидан бери 670 дан кўпроқ қутқарув ишларига жавоб берганини маълум қилган.
100 дан ортиқ мактаб сув тошқини туфайли ёпилган, минглаб уй ва корхоналар электр энергиясидан маҳрум бўлган. Сув тошқинидан жабрланганлар учун эвакуация марказлари очилган.
Ўрта шимолий қирғоқдаги Тари шаҳри энг кўп зарар кўрган. 21 май куни минтақадаги йирик дарёда сув тошқини 6,3 метрдан ошган ва унинг энг юқори даражаси бўйича деярли бир асрлик рекордни янгилаган. Штатнинг ўрта шимолий қирғоғида 10 мингга яқин уйни сув босиши хавфи бор.
“Биз янада ёмонроқ янгиликларга тайёрмиз. Ажралиб қолган аҳолига таъминот етказиб бериш жуда қийин”, дейди Янги Жанубий Уэльс бош вазири Крис Миннс.
Миннс, шунингдек, эвакуацияга тайёр ҳудудлардагиларни агар имкони бўлса, кетишга чақирган. Аммо баъзилари бунга имконияти йўқлигини ҳам тан олган.
“Улар кексалар, ногиронлар, ёш болалар бўлиши мумкин. Аммо агар биз кўпчилик одамларни зарардан қутқара олсак, бу ҳамманинг ишини анча осонлаштиради”, деган у.
