Ҳиндистоннинг Уттар-Прадеш штатида ёққан кучли ёмғир ва момақалдироқ оқибатида камида 45 киши вафот этди. Бу ҳақда “Times Of India” хабар берди.
Маълум қилинишича, ўлимлар асосан Касганж ва Фатеҳпур туманларида рўй берган.
Шунингдек, Читракута ва Амбедкарнагар шаҳарларида икки киши момақалдироқ уриши оқибатида нобуд бўлган.
Газетанинг хабар қилишича, шамол тезлиги соатига 60–100 км гача етган ва момақалдироқ келаси ҳафтага қадар давом этиши мумкин. Кучли ёмғир ва момақалдироқ сабабли Деҳли аэропорти камида 13 та рейс йўналишини ўзгартирган. Аэропортда фаолият юритувчи авиакомпаниялар йўловчиларни рейсларнинг кечикиши ва жадвалидаги ўзгаришлар ҳақида олдиндан огоҳлантирган.
Ҳукумат ҳалок бўлганларнинг оилаларига тезкор компенсация тўлашни маҳаллий ҳокимиятларга топширган.
Билдирилишича, энг катта зарар қишлоқ жойларга етган. Баъзи ҳудудларда “қизил” рангли об-ҳаво хавфи даражаси эълон қилинган.
