НАТО ҳисоб-китобларига кўра, Россиянинг Украинадаги ҳарбий йўқотишлари бир миллион кишидан ошган. Бу ҳақда Германиянинг DW нашри НАТО саммити доирасида Гаагада ўтказилган брифингда иттифоқнинг юқори мартабали расмийсига таяниб хабар берди.
Маълумотга кўра, бу рақамдан камида 250 минг киши жанг майдонида ҳалок бўлган. НАТО вакилининг айтишича, иқтисодий салоҳият нуқтаи назаридан Россия урушни камида 2027 йилгача давом эттира олади.
НАТО Бош котиби Марк Рютте Гааагадаги саммит олдидан Украина Президенти Владимир Зеленский билан ўтказган брифингда Киевга кўрсатилаётган ёрдам давом этишини билдирган. Унга кўра, 2024 йилда иттифоқдошлар Украина хавфсизлиги учун 35 миллиард еврога яқин ёрдам ваъда қилган.
— Биз қўлимиздан келган барча чораларни кўрамизки, тинчлик ўрнатилгач, Украина шунчалик мустаҳкам бўлсинки, Владимир Владимирович Путин бошқа ҳеч қачон унинг бир қарич ҳудудига ҳам даъвогарлик қилолмасин, — дейди Рютте.
Зеленский эса ўз навбатида НАТО ва Европа иттифоқининг Украинага нисбатан бирдамлиги муҳим эканини таъкидлади.
— Сиз бу бирликни Украина атрофида кўриб турибсиз. Бу бирлик бизни кучайтиради, бизга қаршилик кўрсатишда қувват беради, — дейди Украина Президенти.
