Маълум қилинишича, ушбу воқеа 27 июнь куни Гратиот авенюси ва Коннер кўчаси яқинида содир бўлган. Гувоҳларнинг айтишича, бир вертолёт осмондан одамлар устига минглаб долларларни сочган. Иссиқ кунда бу ҳодиса кўчаларда ҳаракатланаётган фуқароларга кутилмаган қувонч олиб келган.
Яқин атрофдаги Motor City Coney Island ресторанида ишловчи Аная Тоней воқеага шахсан гувоҳ бўлган. У пул ёғилаётганини англагач, кўчада одамлар тўпланиб, машиналар тўхтаб қолганини кўрган. Тонейнинг айтишича, Гратиот бўйлаб ҳаракатланаётган барча олти йўналишдаги машиналар бир неча дақиқага тўхтаб, ҳайдовчилар йўл ўртасида машиналаридан тушиб, пул томон югурган.
Полиция воқеа жойига етиб келиб, Гратиотнинг бир қисмини 30 дақиқага ёпган. Ҳозирча Детройт полицияси бу воқеа юзасидан расмий изоҳ бермаган.
Қайд этилишича, ушбу пул ёғдириш бир автоювиш шаҳобчаси эгасининг охирги истаги бўлган. У оламдан ўтаётганда буни охирги истак сифатида айтган.
Билдирилишича, пул ёғилган ҳудудга одамлар тўпланган бўлса-да, воқеа тинч ўтган. Ҳеч қандай жанжал бўлмаган.
