Қозоғистоннинг собиқ адлия вазири Марат Бекетаевга ҳукм чиқарилди. Бу ҳақда Коррупцияга қарши кураш агентлиги расмий вакили Дониёр Бигадаров маълум қилди.
Қайд этилишича, Қозоғистон собиқ адлия вазири Марат Бекетаев мол-мулки мусодара қилинган ҳолда 9 йилга озодликдан маҳрум этилган. Бекетаевга нисбатан қўзғатилган жиноят иши фирибгарлик, ўта йирик ҳажмдаги ўғирлик ва тадбиркорлик фаолиятида ноқонуний иштирок этиш ҳолатлари бўйича тергов қилинган.
“Мазкур иш бўйича тергов “Сир” рукни остида олиб борилганлиги сабабли, барча иш материаллари ва жиноят ҳолатлари ошкор этилиши шарт эмас. Шунинг учун, афсуски, мен бу саволга тўлиқ жавоб бера олмайман”, деди Дониёр Бигадаров.
Марат Бекетаев 2023 йил октябрь ойида ҳибсга олинган. Ўтган йилнинг кузида Остона суди унинг ҳибс муддати узайтирилгани ҳақида хабар берган эди. Коррупцияга қарши кураш хизмати маълумотларига кўра, собиқ вазир “ўзига тегишли бўлган компания манфаатларини қўллаб-қувватлаган ҳолда, очиқ-ойдин кераксиз хизматлар кўрсатиш бўйича йиллик шартномалар тузган ва бу орқали давлатга ўта йирик миқдорда зарар етказган”. 2025 йил 3 мартда жиноят иши судга ўтказилди.
Марат Бекетаев 2016-2022 йилларда адлия вазири бўлиб ишлаган, 2022 йил январидан эса бош вазир маслаҳатчиси бўлган. У бу лавозимдан 2022 йилнинг декабрида бўшатилган, бироқ бу ҳақда фақат 2023 йилнинг февралида маълум бўлган.
