2025-2026-ўқув йили учун тест синовларида иштирок этувчи абитуриентлар энди “Абитуриент рухсатномаси”ни юклаб олишлари мумкин. Бу ҳақда Билим ва малакаларни баҳолаш агентлиги расман маълум қилди.
Агентлик хабарига кўра, абитуриентлар тестга кириш рухсатномасини my.uzbmb.uz сайтида ўзининг шахсий идентификация рақами, паспорт серияси ва рақами орқали юклаб олишлари мумкин.
Бунинг учун сайтдаги “Қайд варағи” бўлимига кириб, махсус тугма орқали рухсатномани олиш лозим.
Шунингдек, шахсий кабинетга кирмасдан ҳам рухсатномани олиш имкони бор.
Бунинг учун my.uzbmb.uz/allow/bachelor-allow саҳифасига кириб, ЖШШИР рақами ва паспорт маълумотларини киритиш кифоя.
Аммо тест синовларига фақатгина ИД-карта ёки паспорт ва рухсатнома билан белгиланган вақтда етиб келган абитуриентларгина киритилади.
Эслатиб ўтамиз, 2025-26-ўқув йили учун давлат олий таълим муассасаларининг бакалавриат таълим йўналишларига ҳамда профессионал таълим муассасаларига абитуриентларни онлайн рўйхатга олиш 25 июнь куни якунланди.
Статистикага кўра, жорий йилда рўйхатдан ўтган абитуриентлар сони 732 411 нафарни ташкил этди. Бу — сўнгги 7 йилдаги энг кам кўрсаткич ҳисобланади.
