Германиянинг жанубида, Зигмаринген–Улм йўналишида ҳаракатланаётган 55-рақамли йўловчи поезди аварияга учради. Ҳодиса Ридлинген ва Мундеркинген ўртасидаги темирйўл участкасида содир бўлди.
Маҳаллий расмийлар хабарига кўра, ҳодиса оқибатида камида 3 киши ҳалок бўлган, 34 нафари тан жароҳати олган, уларнинг 3 нафари оғир аҳволда шифохонага етказилган.
Аниқланишича, поезднинг олд қисми чап томонга оғиб, рельсдан чиқиб кетган. Вагонлар тахминан 5 метр баландликка кўтарилиб, дарахтларга урилган.
Дастлабки маълумотларга кўра, ҳодисага сабаб — кучли ёмғирдан кейин рельслар устига кўчки тушган. Шу сабабли ушбу темирйўл участкасида ҳаракат тўхтатилган.
