Самарқанд шаҳрида фаолият юритувчи хусусий геологик корхона раҳбари ўзини илгари Тоғ-конь саноати ва геология вазирлигида масъул лавозимда ишлаганини айтиб, фуқароларнинг ишончига кирган. У қўлида гўёки Самарқанд ва Жиззах вилоятларида жойлашган олтин конлари ҳақидаги “махфий геологик харита ва суратлар” борлигини таъкидлаб, ушбу маълумотларни 25 минг АҚШ долларига сотишни таклиф қилади.
ДХХнинг Самарқанд вилояти бўйича бошқармаси томонидан ўтказилган тезкор тадбирда у келишилган пулдан 10 минг долларни олаётган вақтида қўлга олинди. Эксперт хулосасига кўра, у тақдим этган маълумотларнинг ҳеч бири махфий эмаслиги аниқланган.
Шунингдек, Қашқадарё вилоятида ҳам худди шундай фирибгарлик ҳолати қайд этилди. “Ўзтрансгаз” таркибидаги “Муборак магистраль газ қувурлари” бошқармаси ходими бўлган Шаҳрисабз ГТС оператори ўзининг юқори лавозимдаги танишлари орқали “Ўзтрансгаз” тизимидаги ташкилотлардан бирига ишга жойлаштиришни ваъда қилган. У назоратчи лавозими эвазига фуқародан 4 минг АҚШ доллари талаб қилади.
ДХХнинг Қашқадарё вилояти бошқармаси ва Иқтисодий жиноятларга қарши курашиш департаменти ҳамкорлигида ўтказилган тадбирда у пулни олаётган вақтида қўлга олинди.
Ҳозирда ушбу шахсларга нисбатан жиноят ишлари қўзғатилиб, тергов ҳаракатлари олиб борилмоқда.
