АҚШ президенти Дональд Трамп Россия президенти Владимир Путин ва Украина раҳбари Владимир Зеленский билан учрашув эҳтимолини “яхши” деб баҳолади.
Трамп матбуот анжуманида бу учрашув “жуда яқин орада бўлиб ўтиши мумкинлигини” билдирди.
CNN манбаларига кўра, Путин яқинда АҚШнинг махсус вакили Стив Уиткофф билан учрашув чоғида Трамп билан музокара ўтказишга тайёр эканини билдирган. Шу заҳоти Вашингтонда учрашувга тайёргарлик ишлари бошланган.
Оқ уй матбуот котиби Керолайн Ливиттнинг сўзларига кўра, Трамп Путин билан ҳам, Зеленский билан ҳам учрашишга очиқ. “Трамп бу шафқатсиз уруш якунланишини хоҳлайди”, – деди у.
Музокаралар кейинги икки ҳафта ичида ўтказилиши мумкин, аммо ҳозирча жойи номаълум. Трамп шунингдек, Россиянинг савдо ҳамкорларига нисбатан иккиламчи санкциялар киритилиши эҳтимолини ҳам инкор этмади.
