Россиянинг Сочи шаҳрида дрон ҳужумлари хавфи туфайли пляжлардаги туристлар шошилинч тарзда хавфсиз ҳудудларга чиқарилмоқда. Шаҳар мери Андрей Прошуниннинг маълум қилишича, аҳолига деразасиз жойларда қолиш ва ташқарига чиқмаслик тавсия этилган.
Мактаблар, пляжлар ва очиқ бассейнлар бўшатилмоқда, жумладан, “Сириус” ҳудудидаги Олимпия объектлари атрофидаги дам олувчилар ҳам эвакуация қилинган.
Сочи аэропортида эса самолётлар парвоз ва қабулида чекловлар жорий этилиб, ўнлаб рейслар кечиктирилмоқда. Шунингдек, Абхазия билан чегарадаги “Псоу” назорат-ўтказув пункти ҳам вақтинча ёпилган.
Ҳукумат фуқаролардан PVO ҳаракатлари ёки дрон қолдиқлари тушаётган видеоларни суратга олишдан тийилишни сўради.
