Ижтимоий тармоқларда бир йигит Абдуллоҳ домла номи билан танилган Абдуғани Умаровнинг бундан 6 йил олдин жойланган маърузасига “класс” босгани учун қамалгани ҳақида хабарлар тарқалди. Ҳолат юзасидан Сурхондарё вилояти судлари маълумот берди.
Билдирилишича, судланувчи У.А. ўзининг телефонига ўрнатилган “Одноклассники.ру” мессенжерига очилган аккаунтидаги “Класс босилганлар” бўлимида 2019 йилда Абдуғани Умаров (Абдуллоҳ домла)нинг “Жаннатга ошиқлар” номли ақидапарастлик ғоялари билан йўғрилган маърузасига “класс” босиш орқали виртуал дўстларига тарқатган.
Бу билан у амалдаги Жиноят кодексининг 2441-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисмининг “г” бандида назарда тутилган жиноятни содир этган.
Жиноят ишлари бўйича Қумқўрғон туман судининг 2025 йил 1 июлдаги ҳукмига кўра, У.А. Жиноят кодексининг 2441-моддаси 3-қисмининг “г” бандида назарда тутилган жиноятни содир қилганликда айбли деб топилиб, шу модда билан унга Жиноят кодексининг 57-моддаси қўлланилиб, 3 йил муддатга озодликдан маҳрум қилиш жазоси тайинланган ва жазони умумий тартибли колонияларда ўташ белгиланган.
Судланувчи У.А. томонидан содир этилган мазкур жиноят оғир турга мансублиги туфайли унга нисбатан озодликдан маҳрум қилиш билан боғлиқ бўлган жазо тайинланган.
“Шундай бўлса-да, жазони енгиллаштирувчи ҳолатларни инобатга олган ҳолда унга Жиноят кодексининг 57-моддаси татбиқ этилиб, модда санкциясидан камроқ жазо муддати тайинланган”, — дейилади хабарда.
