АҚШнинг Украинадаги урушни якунлаш бўйича ишлаб чиққан 28 бандлик тинчлик режаси 20 тага қисқартирилди. Бу ҳақда Украина президенти Владимир Зеленский журналистларга берган интервьюсида айтди.
Унинг сўзларига кўра, режа Украина томони билан ўтказилган маслаҳатлар ортидан қайта шакллантирилган. Зеленский айрим бандлар умуман Украинага алоқадор бўлмагани учун олиб ташланганини билдирди. Шунга қарамай, ҳудудлар билан боғлиқ масалаларда ҳали муроса йўқ.
Президент яна бир бор Украина ўз ҳудудларини беришга ҳақли эмаслигини таъкидлади. Унга кўра, бундай қадам на конституцияга, на халқаро ҳуқуққа тўғри келади.
“Россия биздан ҳудудларни талаб қилмоқда, аммо биз ҳеч нарса беришни хоҳламаймиз — шунинг учун курашамиз”, деди у.
Зеленский хавфсизлик кафолатларига ҳам тўхталиб, АҚШ томонидан берилиши мумкин бўлган аниқ мажбуриятлар Украина учун энг ишончли модель бўлишини қўшимча қилди.
Унинг айтишича, янгиланган тинчлик режаси устидаги ишлар 9 декабрь куни якунланади ва АҚШга тақдим этилади. Шу кунларда Украина делегацияси Маямида АҚШ вакиллари билан уч кунлик музокаралар олиб борган, уларда Трампнинг махсус вакили Стивен Уиткофф, Жаред Кушнер ҳамда жараённинг охирги қисмида Зеленский ҳам иштирок этган.
