The Wall Street Journal манбаларига кўра, АҚШ разведка идоралари, жумладан Марказий разведка бошқармаси (CIA) Россия томони илгари сурган айбловлар бўйича ҳеч қандай ишончли далил топмаган. Нашр таъкидлашича, Кремл 29 декабрдан бери Украина томонидан гўёки Путин қароргоҳига дронлар билан ҳужум уюштирилганини иддао қилиб келмоқда, бироқ бу даъволарни тасдиқловчи материаллар тақдим этилмаган.
29 декабрь куни Россия ташқи ишлар вазири Сергей Лавров Украина Валдайдаги қароргоҳга 91 та дрон билан ҳужум қилганини айтган эди. Ушбу баёнот ортидан бир қатор давлатлар Украина ҳаракатларини қоралаган, аммо орадан бир неча кун ўтишига қарамай, Россия томони ҳужум ҳақиқатан содир бўлганига оид далилларни очиқламади.
Украина президенти Володимир Зеленский эса мазкур айбловларни “Россиянинг навбатдаги ёлғони” деб атаб, Москва уларни Киевга янги зарбалар бериш учун баҳона сифатида ишлатмоқчи бўлаётганини билдирган.
