Навоий вилояти Томди туманида Зарафшон—Навоий йўналиши бўйлаб ҳаракатланаётган автобус йўл-транспорт ҳодисасига учради. Бу ҳақда вилоят ИИБ ахборот хизмати хабар берди.
Қайд этилишича, йўл-транспорт ҳодисаси 5 январь куни тахминан соат 07:40 ларда Томди тумани “Томдибулоқ” ОФЙ ҳудудидан ўтган А-379 “Навоий-Учқудуқ” халқаро аҳамиятга молик автомобиль йўлининг 167-168-километрлари оралиғида содир бўлган.
Дастлабки суриштирувларга кўра, салонида 47 нафар йўловчиси бўлган ZHONG TONG BUS русумли (техник жиҳатдан соз бўлган) автобусни Зарафшон—Навоий йўналиши бўйлаб бошқариб бораётган 1986 йилда туғилган фуқаро Ш.Х. (ҳайдовчи 17 йиллик стажга эга) руль бошқарувини йўқотиб, йўналиши бўйича йўлнинг ўнг томонига чиқиб кетиб ағдарилиб, ЙТҲ содир этган.
Ҳодиса оқибатида йўловчи сифатида кетаётган икки фуқаро олган тан жароҳатлари туфайли воқеа жойида вафот этган. Турли кўринишдаги тан жароҳатлари олган 9 нафар фуқаро тиббиёт муассасаларига ётқизилган.
“Ҳозирда вазиятни тўлиқ ўрганиш, жабрланганлар ва уларнинг оила аъзоларига ёрдам кўрсатиш ҳамда оғир оқибатларга олиб келган шарт-шароитларга ҳуқуқий баҳо бериш мақсадида Навоий вилояти ИИБ томонидан воқеа тафсилотлари ўрганилмоқда”, — дейилади хабарда.
