Шавкат Мирзиёев Ўзбекистон Республикаси Қуролли Кучлари ташкил этилганининг 34 йиллиги ва Ватан ҳимоячилари куни муносабати билан аскар ва сержантлар, офицер ва генераллар, шунингдек, Қуролли Кучлар фахрийларини байрам билан муборакбод этди.
Президент табригида Ватан ҳимояси каби шарафли ва масъулиятли бурчни сидқидилдан адо этиб келаётган ҳарбийларга юксак ҳурмат ва эҳтиром изҳор этилди. Давлат раҳбари мамлакат мустақиллиги, тинчлиги ва ҳудудий яхлитлигини таъминлашда хизмат қилаётган ҳарбийларни она юртнинг ишончли посбонлари сифатида эътироф этди.
Мурожаатда хизмат бурчини бажариш чоғида ҳалок бўлган ҳарбийлар хотираси чуқур эҳтиром билан ёдга олиниб, уларнинг жасорати Ватан тарихида абадий қолиши таъкидланди.
Шунингдек, Янги Ўзбекистонни барпо этиш жараёнида Қуролли Кучларнинг ўрни муҳим экани, мудофаа соҳасида амалга оширилаётган ислоҳотлар миллий армия жанговар салоҳиятини оширишга қаратилгани қайд этилди. "Ўзбекистон — 2030" стратегияси доирасида ҳарбий қудратни мустаҳкамлаш, бошқарув ва таъминот тизимларини такомиллаштириш ишлари давом эттирилаётгани айтилди.
Ҳар бир ҳарбий хизматчи халқ билан армия — бир тан-у бир жон эканини, унинг ортида 38 миллионлик халқ тоғдек таянч бўлиб турганини доимо ҳис этиши керак, — дейилади табрикда.
Президент ҳарбий хизматчилар бундан буён ҳам Ватан олдидаги муқаддас бурчини шараф билан адо этишига ишонч билдирди.
