Халқаро футбол федерацияси (FIFA) доирасида АҚШ президенти Дональд Трампга тинчлик мукофоти берилгани сабаб норозилик кайфияти кучайиб бормоқда. Бу ҳақда The Guardian нашри хабар берди.
Маълум қилинишича, 2025 йил 5 декабрь куни футбол бўйича Жаҳон чемпионати қуръаси маросимида FIFA президенти Жанни Инфантино Трампга ташкилот тарихида илк бор таъсис этилган Тинчлик мукофотини топширган. Бироқ орадан кўп ўтмай АҚШ томонидан Венесуэла пойтахти Каракасга ҳарбий ҳужум уюштирилиб, мамлакат президенти Николас Мадуро қўлга олинган.
Шунингдек, Дональд Трамп Даниянинг Гренландия устидан суверенитетини тан олмаслигини маълум қилгани ва Куба “қулаш арафасида” эканини эълон қилгани ҳам танқидларга сабаб бўлган.
Нашр қайд этишича, FIFA мукофот қайси мезонлар асосида ва нима учун айнан Трампга берилгани бўйича батафсил тушунтириш бермаган. Ташкилот ичидаги юқори лавозимли манбалардан бири ушбу тақдирлаш маросими FIFA раҳбариятида жиддий хавотир уйғотганини ва бу ҳолат “чуқур шармандалик” сифатида қабул қилинганини айтган.
Шу билан бирга, FIFA расмийларидан бири 2026 йилги Жаҳон чемпионатини АҚШда ўтказиш жараёни эндиликда “жуда нозик ва мураккаб” босқичга кирганини тан олган.
