Теннисчи бу ҳақда ўзининг Instagram саҳифасида хабар берган. Унга кўра, ўнг билагидаги жароҳат сабаб ҳали тўлиқ тикланмагани учун мусобақаларга тайёр эмас.
Аввалроқ Алькарас жароҳати туфайли Мадрид “Мастерс” турнири ва Барселонадаги ATP 500 мусобақасини ўтказиб юборган эди. Кейинчалик у Франция очиқ чемпионати ҳамда Рим “Мастерс” турнирида ҳам қатнашмаслиги маълум бўлди.
“Соғайиш жараёни режа бўйича кетмоқда ва ўзимни анча яхши ҳис қиляпман. Аммо ҳозирча мусобақаларда иштирок этишга тайёр эмасман. Шунинг учун Лондон турнири ва Уимблдондан чиқишга қарор қилдим. Бу мен учун жуда муҳим мусобақалар эди ва уларни соғинаман”, деб ёзди Алькарас.
Маълумот учун, 23 ёшли теннисчи жорий мавсумда Австралия очиқ чемпионати ва Доха турнирида ғолиб чиққан. 2025 йилги Уимблдон турнирида эса финалгача етиб бориб, ҳал қилувчи баҳсда Jannik Sinnerга мағлуб бўлган эди.
