“Т24” хабарига кўра, 2024 йил 28 январь куни содир бўлган ҳужумда ниқобли икки шахс ибодат вақтида черковга бостириб кириб, одамларга қарата ўт очган. Оқибатда 52 ёшли Туркия фуқароси Тунжер Жиҳан ҳалок бўлган. Черков руҳонийсининг айтишича, ҳужумчилардан бирининг қуроли ишламай қолгани сабабли қурбонлар сони кўпайиб кетмаган.
Тергов маълумотларига кўра, ҳужум учун жавобгарликни “Исломий давлат” (ИШИД) террорчилик ташкилоти ўз зиммасига олган. Ҳужумни бевосита амалга оширганлар сифатида тожикистонлик Амиржон Ҳоликов ва россиялик Давид Тандуев кўрсатилган. Улар бу ишни “Адам Абу-Даррар ал-Шишани” лақабли тожикистонлик Адам Ҳамирзаевнинг кўрсатмаси билан бажаргани айтилмоқда.
Суд уларни “Конституциявий тузумни зўравонлик йўли билан ағдаришга уриниш” ва “қотилликни оғирлаштирувчи шароитларда қасд қилиб ўлдириш” моддаларида айбдор деб топиб, ҳар бир модда бўйича умрбод қамоқ жазоси тайинлади. Шунингдек, “қасд қилиб ўлдиришга уриниш” бўйича яна 143 йил қамоқ жазоси белгиланди.
Мазкур иш доирасида яна беш нафар Тожикистон фуқароси — Шамшулло Ражабов, Алишер Раҳимов, Фарруҳ Солиев, Абдулазиз Абдуллаев ва Расул Аҳмаджанов ҳам айбдор деб топилди. Уларга жами 101 йил 6 ой қамоқ жазоси тайинланди.
Иш бўйича яна икки шахс — Исминали Мирзоҳонов ва Эделхан Инажаев қуролли террор ташкилотига аъзоликда айбдор деб топилиб, ҳар бири 6 йил 3 ойга қамалди. Суд 31 нафар айбланувчини эса оқлади.
