Хитойда кучли ёмғирлар ва сув тошқинлари оқибатида ҳалок бўлганлар сони 22 нафарга етди. Яна 20 киши бедарак йўқолган деб ҳисобланмоқда. Табиий офат мамлакатнинг бир нечта провинцияларида катта талофатларга сабаб бўлган. Бу ҳақда CNA хабар берди.
Сўнгги кунларда Хитойнинг қатор ҳудудларида рекорд даражада ёғингарчилик кузатилган. Ноқулай об-ҳаво шароити сабаб расмийлар мактаблардаги дарслар ва айрим муассасалар фаолиятини вақтинча тўхтатган. Шунингдек, офат оқибатларини бартараф этиш учун қўшимча маблағ ажратиш ишлари бошланган.
“Синьхуа” агентлиги маълумотига кўра, Хунань провинциясида беш киши ҳалок бўлган, 11 киши эса бедарак йўқолган. Фақат битта уезднинг ўзида жала ёғиши ва тошқинлар 61,5 мингдан ортиқ аҳолига таъсир кўрсатган.
Жанубий Гуанси провинциясида эса қурбонлар сони 10 кишига етган. Хитой ОАВлари хабарига кўра, юк машинаси қирғоқдан тошиб чиққан дарёни кесиб ўтишга уринган вақтда кучли сув оқими транспорт воситасини оқизиб кетган.
Гуйчжоу провинциясида тўрт киши ҳалок бўлган бўлса, қидирув-қутқарув ишлари ҳануз давом этмоқда. Хубэй провинциясида эса сув тошқинлари уч кишининг ўлимига сабаб бўлган, яна тўрт киши бедарак йўқолган деб ҳисобланмоқда.
Тошқинлар оқибатида қатор иншоотлар вайрон бўлган, айрим аҳоли пунктлари билан транспорт ва алоқа узилган.
Хитой ҳукумати жабр кўрган ҳудудларга ёрдам кўрсатиш учун 120 миллион юань маблағ ажратган. Бундан ташқари, жиддий талофатлар кузатилган Гуйчжоу провинцияси учун қўшимча 30 миллион юань йўналтирилган.
Аввалроқ Хитойнинг жанубий ва марказий ҳудудларидаги кучли ёмғирлар кенг кўламли сув тошқинлари ва кўчкиларга сабаб бўлиб, камида 10 киши ҳалок бўлгани ҳақида хабар берилган эди.
