Ўзбекистон Республикаси Президенти Шавкат Мирзиёев ташаббуси ва ғояси асосида ташкил этилган Ислом цивилизацияси маркази — бу динимиз, тарихимиз, фан, маданият ва таълим масалаларига ихтисослашган халқаро кўламда фаолият юритадиган мажмуадир.
Марказнинг музей майдони олтита залдан ташкил топган: "Исломгача бўлган цивилизациялар", "Биринчи Ренессанс", "Иккинчи Ренессанс", "XX асрда Ўзбекистон", "Янги Ўзбекистон — Учинчи Ренессанс пойдевори" ва "Қуръони Карим".
Марказнинг энг асосий қисмидаги Қуръони Карим залидан мусулмон дунёсининг маънавий дурдонаси – қадимий Усмон Мусҳафи ўрин эгаллаган. Шунингдек, сомонийлар, қорахонийлар, хоразмшоҳлар, Ўзбекхон, темурийлар ва бошқа тарихий сулолалар даврида битилган муқаддас китобимиз нусхалари ва уларнинг эски ўзбек тилидаги таржималари ҳам мавжуд.
Таъкидлаш ўринлики, "BBC"нинг "BBC Travel" нашри ҳам Ислом цивилизацияси марказини 2026 йилда очилиши энг кўп кутилаётган олти музей қаторига киритди.
Ўзбекистондаги Ислом цивилизацияси марказининг очилиши нафақат мамлакатимиз, балки бутун мусулмон олами учун тарихий янгилик бўлади. Мазкур марказ "Учинчи Ренессанс" пойдеворини яратиш йўлидаги энг муҳим илмий ва маънавий масканлардан бири сифатида эътироф этилмоқда.
