Россия ТИВ Старобелскдаги ҳужумдан сўнг Киевга жавоб зарбалари тайёрланмоқда Россия қуролли кучлари Старобелск шаҳридаги университетга қилинган ҳужумга жавоб зарбаси тайёрлаётгани хабар қилинди. Бу ҳақда Россия Ташқи ишлар вазирлиги маълумот берди.
Вазирлик баёнотига кўра, хорижий фуқаролар Киевни тарк этишга, шаҳар аҳолиси эса ҳарбий ва маъмурий объектлардан узоқроқ бўлишга чақирилган. Шунингдек, Россия қўшинлари Киевдаги Украина ҳарбий-саноат мажмуасига кирувчи корхоналарга тизимли зарбалар беришни бошлагани айтилади.
Маълум қилинишича, асосий нишонлар қаторида дронлар ишлаб чиқариш ва уларни жанговар ҳолатга келтириш марказлари бор. Вазирлик, шунингдек, бу жараёнда НАТО мутахассислари Украинага эҳтиёт қисмлар етказиш, разведка маълумотлари бериш ва нишонларни белгилашда иштирок этаётганини билдирган.
Ташқи ишлар идораси ушбу зарбалар қарор қабул қилиш марказлари ва қўмондонлик пунктларига ҳам қаратилганини таъкидлаган.
Вазирлик ушбу кескин чораларни 22 майга ўтар кечаси Украина қуролли кучлари томонидан Старобелскдаги Луганск давлат педагогика университети ўқув биноси ва ётоқхонасига қилинган дрон ҳужуми билан боғлаган. Ушбу ҳужум оқибатида 21 киши ҳалок бўлгани, 63 киши жароҳат олгани айтилган. Россия ТИВ бу воқеа учун тўлиқ жавобгарликни Украина томонига юклаб, халқаро ҳуқуқ нормалари бузилганини таъкидлаган.
