Бугун, 27 май куни Қозоғистоннинг Павлодар вилоятида авиация-кимёвий ишларини бажараётган Ан-2 самолёти ҳалокатга учради. Дастлабки маълумотларга кўра, ҳаво кемаси юқори кучланишли электр узатиш тармоғига тегиб кетган. Бу ҳақда “Kazinform” хабар берди.
Ҳаво кемаси “Енгил ва ўта енгил авиация эксплуатантлари” (ELISA) юридик шахслар бирлашмаси томонидан эксплуатация қилинган бўлиб, авиация-кимёвий ишларини амалга ошираётган бўлган.
Дастлабки маълумотларга кўра, самолёт электр узатиш тармоғига тегиб кетганидан сўнг ҳалокат юз берган.
Бортда икки киши бўлган. Уларнинг бири ҳалок бўлган. Иккинчи учувчи Фавқулодда вазиятлар департаменти қутқарувчилари томонидан самолётдан олиб чиқилган.
“Амалдаги қонунчиликка мувофиқ, ушбу авиация ҳодисаси Қозоғистон Республикаси Транспорт вазирлигининг Транспортдаги бахтсиз ҳодисалар ва инцидентларни текшириш департаменти томонидан текширилади. Воқеа жойига департамент ходимлари юборилди”, дейилади Қозоғистон Транспорт вазирлиги баёнотида.
