АҚШ Президенти Дональд Трамп Эрон билан олиб борилаётган музокаралардан қониқмаётганини маълум қилди. Унинг айтишича, вазият ўзгармаса, Америка ҳарбийлари яна ҳарбий ҳаракатларни бошлаши мумкин.
Трамп бу ҳақда 27 май куни Оқ уйда бўлиб ўтган Вазирлар маҳкамаси йиғилишида гапирган.
АҚШ Президентининг сўзларига кўра, Теҳрон ҳозирда можарони тўғридан тўғри ҳал қилишга тайёр. Бироқ Вашингтонни Эрон таклиф қилаётган шартлар қониқтирмаяпти.
“АҚШ ё ўзи учун мақбул келишувга эришади, ёки ишни охирига етказади. Кўрамиз, нима бўларкин”, деган Трамп Эрон билан уруш қайта бошланиши эҳтимолига ишора қилди.
Шунингдек, Трамп Эрон юқори даражада бойитилган уран захираларини топшириши эвазига санкцияларни юмшатиш варианти уни қониқтирмаслигини таъкидлади.
Унинг сўзларига кўра, Теҳрон “юқори даражада бойитилган уранни топширади, аммо бу санкцияларни юмшатиш эвазига бўлмайди”.
