Ўзбекистон Республикаси Президенти Шавкат Мирзиёев Остона шаҳрида бўлиб ўтган Олий Евроосиё иқтисодий кенгаши мажлисида Евроосиё иқтисодий иттифоқи давлатлари билан тўсиқларсиз ягона рақамли савдо маконини яратиш ташаббусини илгари сурди. Бу ҳақда Президент матбуот хизмати хабар берди.
Президент бир қатор йўналишларда ҳамкорликни кенгайтиришни таклиф қилди, жумладан божхона, фитосанитария ва ветеринария соҳаларида рақамли маълумот алмашинуви, электрон ҳужжатларни ўзаро тан олиш ҳамда рақамли транзит тизимини жорий этиш.
Шунингдек, “ақлли” транспорт ва божхона йўлаклари, саноатни автоматлаштириш, робототехника, энергетика ва сув тежовчи технологиялар бўйича қўшма дастурлар ишлаб чиқиш таклиф этилди.
Мирзиёев, шунингдек, ЕОИИ билан ҳамкорликда қўшма лойиҳа офиси ташкил этиш, юқори технологияли инвесторлар учун имтиёзлар яратиш, “яшил” трансформация ва сунъий интеллект орқали саноатни модернизация қилиш масалаларини ҳам қайд этди.
Бундан ташқари, меҳнат миграцияси учун ягона электрон платформа ва “Марказий Осиё туристик ҳалқаси” лойиҳасини ривожлантириш таклиф қилинди.
