Қозоғистон Президенти Қасим-Жомарт Тўқаев раислигида ўтган саммитда Россия Президенти Владимир Путин, Беларусь Президенти Александр Лукашенко, Қирғизистон Президенти Садир Жапаров ва бошқа қатор расмийлар қатнашди.
Йиғилишда кўп томонлама савдо-иқтисодий ҳамкорликни кенгайтириш, саноат кооперациясини ривожлантириш ва қўшма дастурларни амалга ошириш масалалари муҳокама қилинди.
Президент Мирзиёев ўз нутқида Ўзбекистон учун ЕОИИ давлатлари билан ўзаро манфаатли ҳамкорлик ташқи иқтисодий сиёсатнинг муҳим йўналишларидан бири бўлиб қолаётганини таъкидлади.
Давлат раҳбари ўзаро савдо ҳажми ошиб бораётгани, логистика алоқалари мустаҳкамланаётгани ҳамда рақамли иқтисодиёт ва энергетика соҳаларида янги ҳамкорлик йўналишлари шаклланаётганини қайд этди.
Шунингдек, Президент ЕОИИ билан тўсиқларсиз савдонинг ягона рақамли маконини шакллантириш, божхона ва фитосанитария соҳаларида рақамли маълумот алмашинувини йўлга қўйиш муҳимлигини айтди.
Мирзиёев “ақлли” транспорт-божхона йўлакларини яратиш, саноат кооперацияси дастурини ишлаб чиқиш ва “яшил” технологияларни жорий этиш бўйича ҳам таклифлар билдирди.
Бундан ташқари, у меҳнат миграцияси соҳасида миллий электрон бандлик хизматларини интеграция қилиш ҳамда “Марказий Осиё туристик ҳалқаси” ташаббусини биргаликда илгари суришни таклиф қилди.
Президент якунда Ўзбекистоннинг ЕОИИ доирасидаги кўп томонлама дастур ва лойиҳаларда иштироки ўзаро манфаатли шерикликни мустаҳкамлашга хизмат қилишини таъкидлади.
