Андижон вилоятида таркибида кучли таъсир қилувчи модда мавжуд бўлган “Keto coffee mix” маҳсулотларининг ноқонуний савдосига чек қўйилди.
Давлат хавфсизлик хизмати ҳамда Божхона қўмитаси ходимлари ҳамкорлигида ўтказилган тезкор тадбир давомида Марҳамат туманидаги савдо мажмуасида 1991 йилда туғилган фуқаро 900 дона “Keto coffee mix” маҳсулотини 6 миллион сўмга сотаётган вақтида қўлга олинган.
Тергов давомида мазкур маҳсулотлар Андижон шаҳридаги “Жаҳон савдо комплекси” ҳудудида жойлашган дўкондан харид қилингани аниқланган. Шундан сўнг ўтказилган тезкор тадбирлар натижасида 1987 йилда туғилган шахсга тегишли дўкондан яна 480 дона “Keto coffee mix” маҳсулоти олинган.
Маълум қилинишича, мусодара қилинган жами 11 килограмм маҳсулот таркибида кучли таъсир қилувчи “сибутрамин” моддаси борлиги аниқланган. Ушбу модданинг Ўзбекистон ҳудудида муомаласи тақиқланган.
Ҳуқуқни муҳофаза қилувчи органлар томонидан мазкур ҳолат юзасидан жиноят иши қўзғатилган бўлиб, ҳозирда тергов ҳаракатлари давом этмоқда.
