Наманган вилоятида давлат қарамоғидаги 521 нафар етим ва ота-она қарамоғидан маҳрум бўлган болаларнинг омонат ҳисобварақларига 200 АҚШ долларидан ҳайитлик маблағлари ўтказилди. Бу ҳақда Ижтимоий ҳимоя миллий агентлиги маълум қилди.
Маълум қилинишича, ушбу тўловлар Президентнинг Қурбон ҳайити муносабати билан аҳолини қўллаб-қувватлашга оид қарори асосида амалга оширилмоқда. Ҳужжатга мувофиқ, мамлакат бўйлаб эҳтиёжманд оилалар ҳолидан хабар олиш, ижтимоий ҳимояга муҳтож фуқароларга моддий ва маънавий кўмак бериш чоралари кенгайтирилган.
Шунингдек, республика миқёсида 8 мингдан ортиқ етим болалар ҳамда ота-онасини йўқотган, шунингдек, хизмат вақтида ҳалок бўлган ҳарбий хизматчилар фарзандларига ҳам 200 доллардан маблағ ўтказилиши белгиланган.
Наманганда эса мазкур дастур доирасида 521 нафар бола учун маблағлар тегишли омонат ҳисобварақларига йўналтирилган.
Таъкидланишича, хайр-саховат тадбирлари “Вақф” хайрия жамоат фонди маблағлари ҳисобидан молиялаштирилмоқда.
