Бугун, 2 июнь куни эрталаб Навоий шаҳридаги кўп қаватли турар жой биноларидан бирида ёнғин содир бўлди. Бу ҳақда Фавқулодда вазиятлар вазирлиги хабар қилди.
Қайд этилишича, соат 04:19 да “112” ягона диспетчерлик хизматига Навоий вилоятининг Навоий шаҳри, “Кимёгар” маҳалласидаги Алишер Навоий кўчасида жойлашган 9 қаватли уйнинг том қисми ёнаётгани ҳақида хабар келиб тушган.
Хабарга асосан, ёнғин жойига 7 та ёнғин-қутқарув бўлинмаси ҳамда 2 та автонарвон жалб этилган. Қутқарувчилар воқеа жойига соат 04:23 да етиб борган. Ёнғин соат 04:35 да қуршаб олиниб, соат 05:35 да тўлиқ бартараф этилган.
Дастлабки маълумотларга кўра, кўп қаватли уйнинг 9-қаватида жойлашган 8 та хонадоннинг тахминан 300 квадрат метр майдондаги том қисми, шифтлари ва ички қисми ёнган.
Маълум қилинишича, ёнғин оқибатида жабрланганлар ҳақида маълумот келиб тушмаган.
Ҳозирда ёнғиннинг келиб чиқиш сабаблари ҳамда етказилган моддий зарар миқдори аниқланмоқда.
