Оҳангарон шаҳар жиноят ишлари бўйича судида Мудофаа вазирлиги тизимида ишловчи 39 ёшли М.Т.га нисбатан шаҳвоний шилқимлик билан боғлиқ маъмурий иш кўриб чиқилди.
Суд ҳужжатларига кўра, эркак нотаниш қизни Оҳангарон шаҳрига олиб кетиш мақсадида ўз автомобилига миндирган. Йўл давомида у қиз билан танишиб, унга нисбатан ноўрин ҳаракатлар содир этгани қайд этилган.
М.Т. суд мажлисида қилмишини тан олган ва пушаймонлигини билдирган. Шунингдек, у оиласининг ягона боқувчиси экани ҳамда икки нафар вояга етмаган фарзанди борлигини айтган.
Суд қарори билан у Маъмурий жавобгарлик тўғрисидаги кодекснинг 41-1-моддаси 1-қисми (шаҳвоний шилқимлик) бўйича айбдор деб топилиб, 5 сутка маъмурий қамоқ жазосига ҳукм қилинган.
