Тошкент шаҳрида 108 гектар майдонда Миллий дендрология боғини барпо этиш режалаштирилмоқда. Бу ҳақда Президент Шавкат Мирзиёевга тақдим этилган лойиҳада маълум қилинди.
Лойиҳа доирасида 50 минг туп дарахт ва 100 минг туп бута экилади. Боғ ҳаво сифатини яхшилаш, шаҳар микроиқлимини соғломлаштириш ва биохилма-хилликни сақлашга хизмат қилади.
Парк ҳудудида “Дунё дарахтлари” коллекцияси, оранжереялар, дам олиш масканлари, пиёда ва велосипед йўлаклари барпо этилади. Шунингдек, марказида 1 гектарли сунъий кўл ва сакура боғи ташкил қилиниши режалаштирилган.
Мазкур ҳудуд илмий ва таълим маркази ҳамда аҳоли учун экотуризм масканига айланиши кутилмоқда.
