Африка Касалликларни назорат қилиш ва олдини олиш маркази (Africa CDC) Конго Демократик Республикаси ва Угандада давом этаётган Эбола эпидемияси 1976 йилдан буён қайд этилган тўртинчи энг йирик касаллик тарқалиши эканини маълум қилди. Хорижий нашрларга таяниб Zamon.uz хабар берди.
Ташкилот маълумотларига кўра, касалланиш ва ўлим ҳолатлари сони бўйича мазкур эпидемия тарихдаги энг йирик Эбола ўчоқлари қаторига кирган. Africa CDC вазиятни "ўта жиддий" деб баҳоламоқда.
Сўнгги маълумотларга кўра, икки мамлакатда Эбола вирусини юқтиришнинг 397 та ҳолати тасдиқланган. Касаллик оқибатида камида 63 киши ҳаётдан кўз юмган.
Эпидемиянинг тарқалиш занжирини аниқлаш ва янги ҳолатларнинг олдини олиш мақсадида қарийб 10 минг нафар контакт шахс тиббий кузатувга олинган. Уларнинг 4341 нафари Конго Демократик Республикасида, 5009 нафари эса Угандада қайд этилган.
Мутахассислар эпидемиянинг кенг тарқалишига Бундибугё штамми сабаб бўлаётганини билдирмоқда. Ушбу штаммга қарши ҳозирча тасдиқланган вакцина ёки махсус даволаш усули мавжуд эмас.
Шу боис беморларни изоляция қилиш, организмдаги суюқликлар мувозанатини тиклаш, симптоматик даволаш ҳамда оғриқни камайтиришга қаратилган паллиатив ёрдам асосий чора сифатида қўлланилмоқда.
Африка CDC таъкидлашича, махсус терапиянинг мавжуд эмаслиги эпидемияга қарши курашни мураккаблаштирмоқда. Шу сабабли беморларнинг аҳволини доимий назорат қилиш ва қўллаб-қувватловчи даволаш чораларини кучайтириш ўлим ҳолатларини камайтиришда ҳал қилувчи аҳамият касб этмоқда.
