Самарқанд шаҳрида 14 ёшли қиз ҳалок бўлган йўл-транспорт ҳодисаси бўйича суд ҳукми чиқарилди. Бу ҳақда “Zamon” дастурида хабар берилди.
Маълум қилинишича, воқеа жорий йилнинг 10 февраль куни Темирйўлчилар маҳалласида содир бўлган. Вояга етмаган қиз укаси билан велосипед учиб юрган вақтда бошқарувни йўқотиб, йўл четида турган автомобилга урилган ва қатнов қисмига йиқилган.
Шундан сўнг шу йўналишда ҳаракатланиб келаётган юк машинаси уни босиб кетган. Оқибатда қиз олган оғир тан жароҳатлари сабаб воқеа жойида вафот этган.
Судда аниқланишича, 26 ёшли ҳайдовчи аввал ҳам йўл ҳаракати қоидаларини бузиш билан боғлиқ жиноят учун жавобгарликка тортилган. Шунингдек, ҳодиса содир бўлган ҳудудда юк машиналари ҳаракати тақиқланган бўлишига қарамай, у мазкур йўлдан фойдаланган.
Суд ҳайдовчини одам ўлимига сабаб бўлган йўл ҳаракати хавфсизлиги қоидаларини бузишда айбдор деб топди. Унга 6 йил муддатга озодликдан маҳрум қилиш ҳамда 3 йил давомида транспорт воситаларини бошқариш ҳуқуқидан маҳрум этиш жазоси тайинланди.
Шунингдек, суд қарорига кўра, судланувчи жабрланувчи томонга 20 миллион сўм моддий ва 120 миллион сўм маънавий зарар тўлаб бериши белгиланди.
