Исроил ҳарбийлари Ғарбий Соҳил ҳудудида 7 ойлик чақалоқ отиб ўлдирди. Бу ҳақда BBC маълум қилди.
Маълум қилинишича, ҳалок бўлган чақалоқнинг исми Сам Фаҳд Абу Ҳайкал бўлиб, ҳодиса Хеврон шаҳри жанубидаги Тел Румейда ҳудудида содир бўлган. Чақалоқнинг ота-онаси ҳам жароҳат олган.
Исроил Мудофаа армияси баёнотида ҳарбийлар улар томон тез ҳаракатланаётган автомобилни хавф сифатида қабул қилгани ва шу сабаб машинaга бир неча ўқ узгани айтилган.
Армия маълумотига кўра, воқеа оқибатида 3 нафар фаластинлик жароҳатланган ва улар тиббий ёрдамга етказилган. Ҳодиса бўйича текширув бошлангани ҳамда “бегуноҳ инсонларга етган зарар учун афсус” билдирилган.
Чақалоқнинг буваси “Reuters”га берган интервьюсида оила йўлда Исроил ҳарбий техникаси ва аскарларини кўриб, автомобилни тўхтатганини айтган. Унинг сўзларига кўра, дастлаб огоҳлантирувчи ўқлар деб ўйланган, кейин эса ҳақиқий ўқ узилган.
Унинг таъкидлашича, ўқ чақалоқнинг юзига теккан ва бошига шикаст етказган, онасининг юзи ҳам жароҳатланган. Отасининг бармоғи яраланган, онаси эса шифохонада даволанмоқда.
Маълумотларга кўра, 2023 йил 7 октябрдан бошланган Ғазо урушигача Ғарбий Соҳилда 1000 дан ортиқ фаластинлик ҳалок бўлган. Шундан бери Ғазода Исроил ҳужумлари оқибатида 70 600 дан ортиқ одам ҳалок бўлган.
