Россиянинг учувчисиз учиш аппарати Чернобилдаги ишлатилган ядровий ёнилғини сақлаш объектига зарба берди. Бу ҳақда Украинанинг “Энергоатом” компанияси маълум қилди.
Маълум қилинишича, ҳодиса 7 июнга ўтар кечаси содир бўлган. Зарба оқибатида контейнерларни қабул қилиш биноси қисман вайрон бўлган. Бироқ ушбу бинода ҳужум вақтида ишлатилган ядровий ёнилғи сақланмагани қайд этилди.
Ҳодиса жойида 40 квадрат метр майдонда ёнғин чиққан. Ёнғин қисқа вақт ичида ўчирилган. Дастлабки маълумотларга кўра, жабрланганлар йўқ ва объект атрофидаги радиация даражаси меъёрдан ошмаган.
Украина президенти Владимир Зеленскийнинг айтишича, объектга “Shahed” русумидаги дрон зарба берган. У мазкур объект муҳим инфратузилма ҳисобланишини таъкидлади.
Зеленскийга кўра, ҳодиса юзасидан халқаро ҳамкорларга маълумот берилмоқда. У радиация фонида ўзгариш қайд этилмаганини айтган бўлса-да, Россиянинг ҳаракатларини кескин танқид қилди.
Украина ташқи ишлар вазири Андрей Сибига эса Москва томонидан ядро хавфсизлигига таҳдидлар давом этаётганини билдириб, халқаро ҳамжамиятни Россияга нисбатан босимни кучайтиришга чақирди.
Россия расмийлари ҳозирча мазкур ҳодиса бўйича расмий изоҳ бермаган.
