Тошкент шаҳри ва Хоразм вилоятида гиёҳвандлик воситалари савдоси билан боғлиқ икки ҳолат фош этилди. Бу ҳақда Давлат хавфсизлик хизмати маълум қилди.
Қайд этилишича, Давлат хавфсизлик хизмати ва ички ишлар органлари ходимлари ҳамкорлигида ўтказилган тезкор-қидирув тадбирлари давомида уй шароитида гидропоника усулида гиёҳвандлик ўсимликлари етиштириб, уларни интернет орқали сотиш билан шуғулланиб келган шахс фаолиятига чек қўйилган.
Хусусан, 1996 йилда Тошкент шаҳрида туғилган, муқаддам судланган фуқаронинг Мирзо Улуғбек туманидаги кўп қаватли уйлардан бирида жойлашган вақтинчалик яшаш хонадони кўздан кечирилган. Текширув давомида пластик идишда сақланаётган гиёҳвандлик воситаси, 300 дона зип-пакет, изолента ва электрон тарози топилган.
Дастлабки суриштирувларда мазкур шахс Тошкент туманида жойлашган, онасига тегишли хонадонда гиёҳвандлик ўсимликлари етиштириб келаётгани аниқланган.
Ушбу манзил кўздан кечирилганда 10 туп каннабис ўсимлиги, бир туп қуритилган гиёҳвандлик воситаси, шунингдек, уларни парваришлашда фойдаланилган кимёвий воситалар ҳамда электрон тарози ашёвий далил сифатида олинган.
Яна бир ҳолатда эса "Самарқанд — Хоразм" йўналишида ҳаракатланаётган Cobalt русумли автомобиль Тупроққалъа тумани ҳудудида тўхтатилиб, текширилган.
Натижада автомобилда йўловчи сифатида кетаётган, Самарқанд вилоятининг Ургут туманида яшовчи 2003 йилда туғилган шахсга тегишли 810 грамм опий моддаси борлиги маълум бўлган.
Терговга қадар текширув жараёнида ушбу гиёҳвандлик воситаси қўшни давлатдан контрабанда йўли билан олиб кирилгани ва уни Хоразм вилоятида сотиш режалаштирилгани аниқланган.
Ҳозирда мазкур шахснинг эҳтимолий жиноий шерикларини аниқлаш чоралари кўрилмоқда.
