Ўзбекистонда умумий ўрта таълим муассасаларининг 1-синфига қабул жараёнлари жорий йилнинг 20 июнь кунидан бошланади. Бу ҳақда Мактабгача ва мактаб таълими вазирлиги маълум қилди.
Қайд этилишича, 2026/2027 ўқув йили учун мамлакат бўйича 795 мингдан ортиқ бола 1-синфга қабул қилиниши режалаштирилган.
Қабул жараёнлари бу йил ҳам анъанага кўра икки босқичда амалга оширилади.
Биринчи босқич 20 июндан 31 июлга қадар давом этади. Ушбу даврда аризалар боланинг яшаш манзилига бириктирилган микроҳудуд доирасида қабул қилинади.
Иккинчи босқичда эса микроҳудуддан ташқаридаги мактабларга қабул жараёнлари ташкил этилади. Бунда ўқувчиларни қабул қилиш мактабларда мавжуд бўш ўринлар ҳамда таълим муассасасининг имкониятларидан келиб чиққан ҳолда амалга оширилади.
Вазирлик таъкидлашича, "Таълим тўғрисида"ги қонун талабларига мувофиқ, болалар 7 ёшга тўладиган йилда 1-синфга қабул қилинади. Шу сабабли 2026/2027 ўқув йили учун 1-синфга қабул қилинадиган болалар 2019 йил 31 декабрга қадар туғилган бўлиши лозим.
6 ёшли болалар учун эса мактабгача тайёрловнинг мажбурий бир йиллик гуруҳлари фаолият юритади.
Қайд этилишича, мактабларга онлайн қабул жараёнлари Вазирлар Маҳкамасининг 2022 йил 1 июндаги 295-сон қарори билан тасдиқланган маъмурий регламент асосида амалга оширилади.
Масъуллар ота-оналарга қабул жараёнлари бошланиши арафасида зарур ҳужжатларни олдиндан тайёрлаб қўйиш ҳамда расмий ахборот манбаларини кузатиб боришни тавсия этмоқда.
