Россия хавфсизлик хизматлари Президент Владимир Путин ва унинг яқин атрофидаги юқори мартабали мансабдорларни ҳимоя қилиш учун мўлжалланган махсус видеокузатув тизимининг бир қисмини вақтинча ўчириб қўйган. Бу ҳақда Zamon.uz нашри вазиятдан хабардор икки манбага таяниб хабар берди.
Нашр маълумотларига кўра, қарор Эрон олий раҳбари Оятуллоҳ Али Хоманаийга нисбатан эҳтимолий таҳдидлар муҳокама қилинган даврда қабул қилинган. Россия махсус хизматлари замонавий видеокузатув тизимлари орқали юқори мартабали шахсларнинг ҳаракатланиши ва жойлашуви аниқланиши мумкинлигидан хавотир билдирган.
Манбалардан бирининг айтишича, мазкур тизим Москва шаҳар бўйлаб ўрнатилган тахминан 300 мингта кузатув камерасидан алоҳида фаолият юритади. Хавфсизлик нуқтаи назаридан у интернет тармоғидан узилиб, қўшимча аудит ва техник текширувдан ўтказилган. Кейинчалик тизим қайта ишга туширилган.
Бундай чораларга Исроил разведка хизматлари Эрон ҳудудидаги видеокузатув тизимларидан фойдалангани ҳақидаги маълумотлар сабаб бўлган. Нашр манбаларига кўра, юқори мартабали шахсларнинг ҳаракатланишини кузатиш учун йўл камералари орқали йиғилган катта ҳажмдаги видеоёзувлар таҳлил қилинган.
Россия Президенти матбуот котиби Дмитрий Песков нашрнинг бу борадаги саволларига изоҳ бермаган. Шу билан бирга, Федерал хавфсизлик хизмати директори Александр Бортников аввалроқ ҳудудий хавфсизлик идоралари раҳбарларини замонавий видеокузатув тизимларининг эҳтимолий заифликлари ҳақида огоҳлантиргани айтилмоқда.
Унинг таъкидлашича, сунъий интеллект ва видеоаналитика технологияларининг ривожланиши инсонларнинг ҳаракат йўналиши, учрашувлари ва маршрутларини аниқлаш имкониятларини кенгайтирган.
Шунингдек, нашр билан суҳбатлашган украиналик мустақил хакерлардан бири Москва ва Кремль атрофидаги айрим камералар ҳануз фаол эканини ҳамда уларга нисбатан мунтазам киберҳужумлар уюштирилаётганини иддао қилган.
Қайд этишича, замонавий видеоаналитика тизимлари маълум бир ҳолатларни матнли сўровлар орқали қидириш имконини беради. Масалан, “икки киши сумка алмашмоқда” ёки “бир автомобил қисқа вақт ичида бир ҳудуддан бир неча марта ўтган” каби ҳолатларни автоматик аниқлаш мумкин.
Мутахассислар фикрича, бундай технологиялар хавфсизлик соҳасида янги имкониятлар яратаётган бўлса-да, давлат раҳбарлари ва стратегик аҳамиятга эга шахсларни ҳимоя қилиш вазифасини янада мураккаблаштирмоқда.
