Президент Шавкат Мирзиёев олий таълим муассасалари битирувчиларининг бандлигини таъминлаш масалаларига бағишланган тақдимот билан танишди. Бу ҳақда Президент матбуот хизмати хабар қилди.
Маълум қилинишича, 2026 йилда республика олийгоҳларини 320 минг нафар талаба битириши кутилмоқда. Сўнгги йилларда олий таълим билан қамров даражаси кенгайгани сабаб меҳнат бозорига кириб келаётган битирувчилар сони ҳам ортиб бормоқда.
Тақдимотда ёшларни иш билан таъминлаш, уларни мавжуд бўш иш ўринларига йўналтириш, тадбиркорлик ташаббусларини қўллаб-қувватлаш ҳамда олийгоҳлардаги карьера марказлари фаолияти самарадорлигини ошириш масалалари муҳокама қилинди.
Қайд этилишича, “Келажакка қадам” дастури доирасида 2025 йилда 6 мингдан ортиқ лойиҳа учун 378 миллиард сўм маблағ ажратилган ва бу орқали қарийб 8 минг нафар битирувчининг бандлиги таъминланган. 2026 йилда эса 8 мингдан зиёд лойиҳани молиялаштириш учун 500 миллиард сўм йўналтириш ҳамда 10 мингга яқин ёшни иш билан таъминлаш режалаштирилган.
Шунингдек, “TalabaExpo–2026” меҳнат ва касб кўргазмаларини ҳудудларда кенгайтириш, битирувчилар бандлигини таъминлаш бўйича вазирлик ва идоралар, маҳаллий ҳокимликлар ҳамда йирик корхоналар масъулиятини кучайтириш зарурлиги таъкидланди.
Бандликка кўмаклашувчи “career.edu.uz” платформаси орқали барча жараёнларни мониторинг қилиш ва битирувчилар билан ишлашнинг ягона вертикал тизимини жорий этиш режалаштирилмоқда.
Тақдимотда олийгоҳларда карьера марказлари фаолиятини тўлиқ йўлга қўйиш, меҳнат ярмаркалари ва иш берувчилар билан учрашувлар сонини ошириш, талабаларнинг стартап лойиҳаларини қўллаб-қувватлаш бўйича янги механизмлар ҳам таклиф қилинди.
Бундан ташқари, 2026/2027 ўқув йилидан бошлаб барча олий таълим муассасаларида “Тадбиркорлик асослари” фанини ўқитиш йўлга қўйилади.
Президент мутасаддиларга битирувчилар билан ишлаш тизимини такомиллаштириш, билдирилган ташаббусларни пухта ишлаб чиқиш ва янги иш ўринлари яратиш бўйича тегишли топшириқлар берди.
