Ўзбекистонда Жиноят кодексига киритилаётган ўзгартишлар билан суд ишларини ҳал этиш жараёнига ноқонуний аралашганлик учун жиноий жавобгарлик чоралари янада аниқлаштирилмоқда. Бу ҳақда 13 июнь куни Олий Мажлис Сенатининг 16-ялпи мажлисида муҳокама қилинган қонун лойиҳасида сўз борди.
Қайд этилишича, мамлакатда суд ҳокимияти мустақиллигини таъминлаш, одил судловга бўлган ишончни ошириш ҳамда суд тизимини янада шаффоф қилиш бўйича изчил ислоҳотлар амалга оширилмоқда. Шунга қарамасдан, амалиётда айрим ҳолатларда суд фаолиятига ташқи таъсир ва аралашув ҳолатлари кузатилмоқда.
Шу сабабли, янги қонун билан Жиноят кодексида суд ишларига ноқонуний аралашганлик учун жавобгарлик нормалари аниқ ва қатъий тарзда белгиланмоқда. Шунингдек, Маъмурий жавобгарлик тўғрисидаги кодексга ҳам ўзгартишлар киритилиб, суд биноларида тартибни бузиш ва судга нисбатан ҳурматсизлик қилиш ҳолатлари учун маъмурий чоралар кучайтирилмоқда.
Муҳокамалар давомида қайд этилишича, қонун лойиҳаси аввал Қонунчилик палатасига қайта ишлаш учун юборилган бўлиб, келиб тушган эътирозлар асосида такомиллаштирилган. Ҳужжатда асосан суд мустақиллигини таъминлашга қаратилган нормалар сақлаб қолинган.
Сенаторлар мазкур қонунни маъқулладилар.
Эслатиб ўтамиз, аввалроқ суд аппаратида коррупциянинг олдини олиш мақсадида Олий суд таркибида Комплаенс назорат хизмати ташкил этилиши ҳақида хабар берилган эди.
