Ўзбекистон Президенти Шавкат Мирзиёев Россия Федерацияси Президенти Владимир Путинни мамлакатнинг миллий байрами — Россия куни муносабати билан самимий табриклади.
Давлат раҳбарининг табрик мактубида ушбу сана Россия халқининг бой маънавий мероси, миллий қадриятлари ҳамда тараққиёт ва юксалиш сари интилишини ўзида мужассам этиши таъкидланган.
Шунингдек, мактубда Ўзбекистон ва Россия ўртасидаги икки томонлама муносабатлар изчил ривожланиб бораётгани, савдо-иқтисодий, ҳудудлараро ва гуманитар соҳалардаги ҳамкорлик янги босқичга кўтарилгани қайд этилган. Хусусан, яқинда Санкт-Петербург шаҳрида бўлиб ўтган олий даражадаги музокаралар мамлакатлар ўртасидаги анъанавий дўстлик ва стратегик шериклик муносабатларининг мустаҳкамлигини яна бир бор намоён этгани билдирилган.
Президент ўз табригида эришилган келишувлар икки давлат ўртасидаги дўстона муносабатлар ва ўзаро манфаатли ҳамкорликни янада чуқурлаштириш, шунингдек, халқлар фаровонлиги йўлида кўп қиррали шериклик салоҳиятини тўлиқ рўёбга чиқаришга хизмат қилишига ишонч билдирган.
Маълумот ўрнида, 1990 йил 12 июнь куни РСФСР халқ депутатлари қурултойи томонидан "Россиянинг давлат суверенитети тўғрисидаги декларация" қабул қилинган. Мазкур сана мамлакат мустақиллиги ва замонавий давлатчилик тарихида муҳим босқич сифатида эътироф этилади. Илк бор 1992 йилдан нишонлана бошланган байрам дастлаб "Давлат суверенитети тўғрисидаги декларация қабул қилинган кун" деб аталган бўлса, 2002 йилдан эътиборан расман "Россия куни" номи билан нишонланиб келинмоқда.
