13 июнь куни Сенат ялпи мажлисида коррупцияга қарши курашиш соҳасидаги қонунчиликни такомиллаштиришга қаратилган қонун маъқулланди.
Ҳужжатга мувофиқ, Жиноят кодексига "коррупцияга оид жиноятлар" атамаси киритилиб, ушбу тоифага кирадиган жиноятларнинг аниқ рўйхати белгиланади. Ташаббускорларга кўра, бу амалиётдаги турлича талқинлар ва терминологик чалкашликларни бартараф этишга хизмат қилади.
Шунингдек, пора олиш, пора бериш ва пора олиш-беришда воситачилик қилиш жиноятлари учун ҳукм қилинган шахсларга нисбатан жазодан муддатидан илгари шартли озод қилиш тартибини қўллаш тақиқланмоқда.
Қонун билан хизмат мавқеидан фойдаланган ҳолда содир этилган фирибгарлик учун жавобгарлик ҳам кучайтирилмоқда. Хусусан, Жиноят кодексининг 168-моддаси бўйича ушбу қилмиш оғирроқ тоифага ўтказилиб, максимал жазо муддати 8 йилдан 10 йилгача оширилмоқда.
Бундан ташқари, нодавлат ёки хусусий ташкилот ходимини пора эвазига оғдириб олиш билан боғлиқ жиноятлар учун ҳам қатъийроқ жавобгарлик чоралари белгиланмоқда.
Қонунга кўра, бир қатор жиноятларнинг "ғаразгўйлик ниятларида" содир этилиши жазони оғирлаштирувчи ҳолат сифатида баҳоланади.
Давлат харидлари соҳасида ҳам санкциялар кучайтирилмоқда. Ҳужжат доирасида "Ўзбекистон Республикасининг Ҳисоб палатаси тўғрисида"ги қонунга ҳам ўзгартириш киритилиб, айрим назорат ваколатлари бекор қилинган.
Шунингдек, Маъмурий жавобгарлик тўғрисидаги кодексга киритилган ўзгартиришлар давлат харидлари ва бюджет тизимидаги қонунбузилишлар учун жазоларни кучайтиришни назарда тутади.
