Марказий банк 6 августдан бошлаб банкоматлар орқали нақд пул ечиб олишда мижозларга хизмат кўрсатиш билан боғлиқ қоидабузарликлар учун тижорат банкларига молиявий жарималар қўллайди. Бу ҳақда Марказий банк раиси Тимур Ишметов Сенатнинг 13 июнь куни бўлиб ўтган ялпи мажлисида маълум қилди.
Унинг айтишича, 2025 йилда банкоматлар орқали 341 миллион операция амалга оширилган бўлиб, муаммоли транзакциялар улуши 0,08 фоизни ташкил этган.
Қайд этилишича, носозликларнинг катта қисми банклар фаолияти билан эмас, балки банкоматда зарур номиналдаги купюралар йўқлиги, карта блокланиши, PIN-коднинг нотўғри киритилиши, алоқа ва электр таъминотидаги узилишлар билан боғлиқ.
Тимур Ишметовнинг таъкидлашича, янги тартиб мижозлар ҳуқуқларини ҳимоя қилиш ва банкларнинг хизмат сифати учун масъулиятини оширишга қаратилган.
Шунингдек, фуқаролар мурожаатлари билан ишлаш самарадорлиги бўйича банклар рейтинги шакллантирилиб, энг паст кўрсаткичга эга банклар жамоатчиликка эълон қилиб борилади.
