Тошкент вилоятининг Оҳангарон туманида ички ишлар органлари ходимларига пичоқ билан ҳужум қилинди. Бу ҳақда Kun.uz манбаларига таяниб хабар бермоқда.
Маълум қилинишича, воқеа 15 июнга ўтар кечаси туманнинг Эйвалак маҳалласи ҳудудида содир бўлган. Хизмат олиб бораётган патруль-пост хизмати ходимлари бир гуруҳ маст фуқароларни кўриб, уларни тартибга чақирган.
Манбага кўра, ходимлар маъмурий баённома расмийлаштиришга уринган вақтда тортишув юзага келган. Шундан сўнг фуқаролардан бири пичоқ билан ҳужум қилиб, профилактика инспекторига тан жароҳати етказган.
Қайд этилишича, воқеа жойига етиб келган бошқа ички ишлар ходимлари ўзларини ҳимоя қилиш мақсадида хизмат қуролини қўллашга мажбур бўлган.
Kun.uz ихтиёридаги маълумотларга кўра, ушбу жиноятни содир этганликда гумонланаётган Оҳангарон туманида яшовчи 34 ёшли эркак қидирувга берилган.
Мазкур ҳолат юзасидан Жиноят кодексининг 25, 97-моддалари билан, яъни қасддан одам ўлдиришга суиқасд қилиш аломатлари бўйича жиноят иши қўзғатилган.
Айни вақтда Бош прокуратура ҳамда Ички ишлар вазирлиги ушбу воқеа юзасидан расмий маълумот берганича йўқ.
