Тошкент ва Самарқанд вилоятларида ўтказилган тезкор тадбирлар давомида йирик миқдордаги наркотик моддалар мусодара қилинди. Бу ҳақда Давлат хавфсизлик хизмати маълум қилди.
Қайд этилишича, Давлат хавфсизлик хизмати ва Божхона қўмитаси ходимлари ҳамкорлигида Тошкент вилоятининг Бекобод шаҳрида ўтказилган тезкор тадбирда 1992 йилда туғилган шахс қўлга олинган. У Жиноят кодексининг 246-моддаси (контрабанда) ва 273-моддасида назарда тутилган жиноятларни содир этганликда гумон қилиниб, 2025 йилдан буён қидирувда бўлган.
Тезкор тадбир доирасида унинг ижарага олган хонадони кўздан кечирилганда, ошхонадаги музлатгич ичида 151 грамм опий, ҳожатхона шахтасида эса 4 килограмм 971 грамм гашиш сақланаётгани аниқланган.
Дастлабки маълумотларга кўра, мазкур наркотик моддалар қўшни давлатдан контрабанда йўли билан олиб кирилган. Гумонланувчига нисбатан қамоқ эҳтиёт чораси қўлланилган.
Шунингдек, Давлат хавфсизлик хизматининг Самарқанд вилояти бўйича бошқармаси, Чегара қўшинлари ҳамда ички ишлар органлари ходимлари ҳамкорлигида Ургут туманида ўтказилган тезкор тадбирда 2003 йилда туғилган икки нафар фуқаро қўлга олинган.
Маълум бўлишича, улар шартли харидорга 932 грамм гашиш ва 2,5 грамм опий моддасини 10 минг АҚШ долларига сотаётган вақтда ашёвий далиллар билан ушланган.
Ҳозирда мазкур ҳолат юзасидан жиноят иши қўзғатилган. Гумонланувчиларга нисбатан қамоқ эҳтиёт чораси қўлланилган бўлиб, тергов ҳаракатлари давом этмоқда.
