Туркиянинг Ҳатай вилояти Арсуз туманида Ўзбекистон томонидан қуриб берилган турар жой мажмуаси негизида ташкил этилган "Ўзбекистон маҳалласи", шунингдек, Шавкат Мирзиёев булвари ҳамда Тошкент ва Самарқанд кўчаларининг тантанали очилиш маросими бўлиб ўтди. Бу ҳақда "Дунё" ахборот агентлиги хабар қилди.
Маросимда Ўзбекистон Олий Мажлиси Қонунчилик палатаси Спикери Нуриддин Исмоилов бошчилигидаги делегация, Хоразм вилояти ҳокими Жўрабек Раҳимов, Туркия Буюк Миллат Мажлиси раиси Нуман Куртулмуш, Ҳатай вилояти ҳокими Мустафо Масатли, маҳаллий расмийлар ва жамоатчилик вакиллари иштирок этди.
Тадбирда сўзга чиққан Нуман Куртулмуш мазкур ташаббус Туркия халқининг ўзбек халқига бўлган самимий ҳурмати ва миннатдорлигининг рамзи эканини таъкидлади.
"Арсузда Ўзбекистоннинг бой тарихи ва маданиятини ўзида мужассам этган номларнинг абадийлаштирилиши икки қардош халқ ўртасидаги мустаҳкам дўстликнинг ёрқин ифодасидир. Бу оғир кунларда Туркия билан елкама-елка турган ўзбек халқига бўлган юксак эҳтиром белгисидир", деди Туркия парламенти раҳбари.
Маросим иштирокчилари Ўзбекистонда барпо этилаётган Ислом цивилизацияси марказига ҳам алоҳида тўхталиб ўтди. Ушбу марказ туркий дунёнинг муҳим маънавий ва илмий масканларидан бири сифатида эътироф этилди. Шунингдек, Президент Шавкат Мирзиёев раҳбарлигида амалга оширилаётган ислоҳотлар ва "Янги Ренессанс" ғояси юксак баҳоланди.
Ҳатай вилояти ҳокими Мустафо Масатли эса 2023 йил 6 февралдаги ҳалокатли зилзиладан кейин Ўзбекистон томонидан кўрсатилган амалий ёрдам турк халқи хотирасида абадий сақланишини айтди.
"Ҳатай аҳолиси номидан дўст ва қардош ўзбек халқига чуқур миннатдорлик билдираман. Жорий йил январь ойида Анқарада бўлиб ўтган олий даражадаги учрашувлар доирасида расман очилган мазкур турар жой мажмуасига “Ўзбекистон маҳалласи” номи берилиши халқларимиз ўртасидаги абадий дўстликнинг яна бир тимсолидир",— деди Мустафо Масатли.
Тантанали маросим давомида Шавкат Мирзиёев булвари, Тошкент ва Самарқанд кўчаларининг очилиши муносабати билан рамзий тасма кесилди.
Қайд этилишича, мазкур турар жой мажмуаси Ўзбекистоннинг Ҳатай вилоятини қайта тиклаш бўйича кўрсатган гуманитар ёрдамининг муҳим намунаси ҳисобланади. Лойиҳа икки мамлакат ўртасидаги стратегик шериклик ва қардошлик муносабатларининг амалий ифодаси сифатида баҳоланмоқда.
