Кўксарой қароргоҳида Ўзбекистон Республикаси Президенти Шавкат Мирзиёев ва Албания Республикаси Президенти Байрам Бегай ўртасида расмий делегациялар иштирокида музокаралар бўлиб ўтди.
Учрашувда икки мамлакат ўртасидаги амалий ҳамкорликни янада кенгайтириш ва янги йўналишларда ривожлантириш масалалари муҳокама қилинди.
Музокаралар аввалида Президент Шавкат Мирзиёев Ўзбекистон ва Албания муносабатлари тарихида биринчи марта давлат раҳбарлари даражасида саммит ўтказилаётганини таъкидлаб, мазкур ташриф икки томонлама алоқаларни сифат жиҳатидан янги босқичга олиб чиқишини қайд этди.
Томонлар кейинги йилларда сиёсий мулоқот ва турли даражадаги алоқалар сезиларли фаоллашганини мамнуният билан қайд этди. Шунингдек, БМТ ва бошқа халқаро ташкилотлар доирасидаги ҳамкорлик ҳам юқори баҳоланди.
Музокараларда савдо-иқтисодий муносабатларни кенгайтириш, агросаноат мажмуаси, «яшил» энергетика, геология, ахборот технологиялари, рақамлаштириш ва туризм соҳаларида қўшма лойиҳаларни амалга ошириш масалаларига алоҳида эътибор қаратилди.
Шу билан бирга, Ўзбекистон маҳсулотларини Жанубий Европа ва Ўрта Ер денгизи мамлакатлари бозорларига етказиб беришда Албаниянинг Дуррес порти имкониятларидан фойдаланиш истиқболлари муҳокама қилинди.
Томонлар иқтисодий ва инвестициявий ҳамкорликнинг ҳуқуқий базасини кенгайтириш муҳимлигини таъкидлаб, Ҳукуматлараро комиссия ташкил этишга келишиб олди. Комиссиянинг биринчи йиғилиши жорий йилда Тошкент шаҳрида ўтказилади.
Маданий-гуманитар ҳамкорлик доирасида эса ўзаро Маданият кунлари, кино намойишлари, кўргазмалар ва ижодий ташрифларни ташкил этиш масалалари кўриб чиқилди.
Шунингдек, давлат раҳбарлари минтақавий ва халқаро кун тартибидаги долзарб масалалар юзасидан ҳам фикр алмашди.
Қайд этилишича, мазкур музокаралар Ўзбекистон ва Албания ўртасидаги ҳамкорликни янги босқичга олиб чиқиш йўлидаги муҳим қадам сифатида баҳоланмоқда.
